ភ្នំពេញ៖ ក្រសួងយុត្តិធម៌បានសម្រេចដាក់ដំណើរការផ្ដល់ព្រឹត្តបត្រថ្កោលទោស (លិខិតថ្កោលទោស) តាមប្រព័ន្ធឌីជីថលដំណាក់កាលទី២ ចាប់ពីថ្ងៃទី២ ខែឧសភា ឆ្នាំ២០២៤ ដើម្បីជួយសម្រួលភាពងាយស្រួលដល់អ្នកស្នើសុំ។

អ្នកស្នើអាចទាញយកកម្មវិធីទូរស័ព្ទដែលមានឈ្មោះ «CR-MOJ» ពី App Store ឬ Play Store ដើម្បីប្រើប្រាស់ក្នុងការបំពេញបែបបទពាក្យសុំ ដោយភ្ជាប់នូវឯកសារចាំបាច់មួយចំនួនតាមរយៈ App នេះ ជាមួយនឹងការទូទាត់ប្រាក់ផងដែរ។

ក្នុងសេចក្ដីជូនដំណឹងបញ្ជាក់ថា នៅពេលដល់ថ្ងៃកំណត់ទទួលយកព្រឹត្តិបត្រថ្កោលទោស សម្រាប់អ្នករស់នៅក្នុងប្រទេស ត្រូវអញ្ជើញមកទទួលដោយផ្ទាល់នៅនាយកដ្ឋានកិច្ចការថ្កោលទោសនៃក្រសួងយុត្តិធម៌ ហើយសម្រាប់ពលរដ្ឋខ្មែរដែលនៅក្រៅប្រទេសត្រូវទៅយកនៅតាមបណ្ដាស្ថាទូត ស្ថានកុងស៊ុល ឬនៅតាមការិយាល័យប្រៃណីយ៍ ដែលនៅជិតបំផុតដោយមានភ្ជាប់មកជាមួយឯកសារច្បាប់ដើមពាក់ព័ន្ធផងដែរ។

ទោះបីជាមានការដាក់ឱ្យដំណើរការសេវាកម្មតាមឌីជីថលក្ដីសាធារណជននៅតែអាចមកបំពេញបែបបទស្នើសុំព្រឹត្តិបត្រថ្កោលទោសដោយផ្ទាល់នៅនាយកដ្ឋានកិច្ចការថ្កោលទោស នៃក្រសួងយុត្តិធម៌ដដែលផងដែរ៕